ബുധനാഴ്‌ച, മേയ് 15, 2013

3 നേർരേഖാതുരങ്കങ്ങൾ

പണ്ടെല്ലാ വഴികളും
നേർരേഖയിലുള്ള തുരങ്കങ്ങൾ പോലായിരുന്നു.
ഒരറ്റത്തെ വെളിച്ചം
തീർച്ചയായും
മറ്റേ അറ്റത്തുമെത്തുമായിരുന്നു.

നീണ്ടൊരു തുരങ്കത്തിലെ
കുരുമുളകുവെളിച്ചം കണ്ടാണ്
ഗാമ
പോർച്ചുഗലിൽ നിന്നും കാപ്പാട്ടേയ്ക്ക്
ഒരു നേർരേഖ തീർത്ത് നീന്തിയത്.

മറുവശത്തെ ഹരിതശോഭയിൽ
മോഹിപ്പിച്ചു മോഹിപ്പിച്ചാണ്
ആദിദ്രാവിഡരെ
ഒരു നേർരേഖാതുരങ്കത്തിലൂടെ
മല കയറ്റിയത്.

ഇങ്ങിനെയുള്ള തുരങ്കങ്ങളിലൂടെ
നൂണ്ടു വന്നാണിവിടെ
ആര്യകൃസ്തീയതേസ്ലാമിസം
മൂത്തുപഴുത്തതും
വീണു ചീഞ്ഞതും പുഴുത്തതും.

പിൽക്കാലത്തീ തുരങ്കങ്ങൾ
ബ്രൂട്ടസിന്റെയും മുസ്സോളിനിയുടെയും
ചത്ത രക്തമൊഴുകുന്ന
ഭരണസിരകളായി.

കൊഴുപ്പടിഞ്ഞ്
ശ്വാസം മുട്ടി
അവ ചുരുണ്ടുകിടന്നു.
നേർരേഖയെല്ലാം വക്രമായി.

ഒരറ്റത്തെ വെളിച്ചം
ഒരു രീതിയിലും
മറ്റേയറ്റത്ത് എത്തില്ലെന്നായി

3 അഭിപ്രായങ്ങൾ:

  1. //മൂത്തുപഴുത്തതും
    വീണു ചീഞ്ഞതും പുഴുത്തതും.//

    അത് സമ്മതിച്ചു തരീല്ല. പുഴുത്തതും എന്ന് മാറ്റി കിളിര്‍ത്തതും എന്നാക്കിയില്ലേല്‍ പ്രദര്‍ശ/പ്രസിദ്ധീകരണാനുമതി നിഷേധിക്കും.

    മറുപടിഇല്ലാതാക്കൂ
  2. തുരങ്കത്തിനപ്പുറത്ത് വെട്ടമുണ്ടോ..?

    മറുപടിഇല്ലാതാക്കൂ
  3. ഇന്ന് ഭരണസിരകളില്‍ ആര്‍ത്തിപെരുകുന്നു!
    ആശംസകള്‍

    മറുപടിഇല്ലാതാക്കൂ